ഒക്ടോബർ 7 ആക്രമണത്തിന്റെ മൂന്നാം വാർഷികത്തിൽ വൻ തിരിച്ചടി നേരിട്ട് ഹമാസ്: സൈനിക നേതൃത്വം തകർന്നു, ഗാസയിലെ ഭരണം ഔദ്യോഗികമായി അവസാനിപ്പിച്ചു; 68,000-ത്തിലധികം ആളുകൾ കൊല്ലപ്പെട്ട യുദ്ധത്തിന് ഒടുവിൽ ഹമാസിനെതിരെ പ്രാദേശിക പ്രക്ഷോഭം ശക്തം; ഇനി തിരിച്ചുവരവ് അസാധ്യമെന്ന് അന്താരാഷ്ട്ര നയതന്ത്ര വിദഗ്ധരും ഇസ്രായേൽ രഹസ്യാന്വേഷണ ഏജൻസികളും

ഒക്ടോബർ 7 ആക്രമണത്തിന്റെ മൂന്നാം വാർഷികത്തിൽ വൻ തിരിച്ചടി നേരിട്ട് ഹമാസ്: സൈനിക നേതൃത്വം തകർന്നു, ഗാസയിലെ ഭരണം ഔദ്യോഗികമായി അവസാനിപ്പിച്ചു; 68,000-ത്തിലധികം ആളുകൾ കൊല്ലപ്പെട്ട യുദ്ധത്തിന് ഒടുവിൽ ഹമാസിനെതിരെ പ്രാദേശിക പ്രക്ഷോഭം ശക്തം; ഇനി തിരിച്ചുവരവ് അസാധ്യമെന്ന് അന്താരാഷ്ട്ര നയതന്ത്ര വിദഗ്ധരും ഇസ്രായേൽ രഹസ്യാന്വേഷണ ഏജൻസികളും

ടെല് അവീവ് : പശ്ചിമേഷ്യന് രാഷ്ട്രീയത്തെയും സുരക്ഷാ സമവാക്യങ്ങളെയും തകിടം മറിച്ച ഒക്ടോബര് 7 ഹമാസ് ആക്രമണത്തിന് മൂന്ന് വര്ഷം തികയുമ്പോള്, ഗാസ മുനമ്പിലെ ഹമാസിന്റെ പരമാധികാരവും ഭരണവും പൂര്ണ്ണമായി അസ്തമിച്ചതായി റിപ്പോര്ട്ട്. മൂന്ന് വര്ഷം നീണ്ടുനിന്ന ശക്തമായ സൈനിക ആക്രമണങ്ങളില് ഹമാസിന്റെ സൈനിക ഘടന തകരുകയും മുന്നിര രാഷ്ട്രീയ-സൈനിക നേതാക്കളായ ഇസ്മായില് ഹനിയ്യ, യഹ്യ സിന്വാര്, മുഹമ്മദ് ദീഫ് എന്നിവര് കൊല്ലപ്പെടുകയും ചെയ്തതോടെ പ്രസ്ഥാനം പൂര്ണ്ണമായും ദുര്ബലപ്പെട്ടു. ഭരണകൂടത്തിന്റെ തകര്ച്ചയെ തുടര്ന്ന് കഴിഞ്ഞ ജൂലൈയില് ഗാസയിലെ തങ്ങളുടെ സിവിലിയന് ഭരണ സമിതി ഔദ്യോഗികമായി പിരിച്ചുവിട്ടതായി ഹമാസ് പ്രഖ്യാപിച്ചിരുന്നു. നിലവില് ഖലീല് അല് ഹയ്യയുടെ നേതൃത്വത്തില് ദോഹ കേന്ദ്രീകരിച്ച് പ്രവര്ത്തിക്കുന്ന ഹമാസിന് ഗാസയില് ഒരു ഭരണകൂടമായി തിരികെ വരാന് ഇനി സാധിക്കില്ലെന്നാണ് അന്താരാഷ്ട്ര നിരീക്ഷകരും പ്രതിരോധ വിദഗ്ധരും വിലയിരുത്തുന്നത്. ഇസ്രായേല് പ്രതിരോധ സേനയുടെ കര്ശനമായ ഉപരോധവും 80 ബില്യണ് ഡോളറിലധികം ചെലവ് പ്രതീക്ഷിക്കുന്ന പുനര്നിര്മ്മാണ ഫണ്ടുകളില് അന്താരാഷ്ട്ര സഹകരണം ലഭിക്കില്ലെന്ന യാഥാര്ത്ഥ്യവും ഹമാസിന് തിരിച്ചടിയാണ്. ഗാസയിലെ 85 ശതമാനത്തിലധികം വരുന്ന ജനങ്ങള് കുടിയൊഴിപ്പിക്കപ്പെടുകയും 68,000-ത്തിലധികം ആളുകള് കൊല്ലപ്പെടുകയും ചെയ്ത പശ്ചാത്തലത്തില്, ഹമാസിന്റെ അധികാര കുത്തകയ്ക്കെതിരെ പ്രാദേശിക ഗോത്രവിഭാഗങ്ങളും സാധാരണ ജനങ്ങളും ശക്തമായ പ്രതിഷേധവുമായി രംഗത്തുണ്ട്. സംഘടിത സൈനിക വിഭാഗത്തില് നിന്ന് ഒളിപ്പോര് നടത്തുന്ന ചെറുകിട ഗ്രൂപ്പുകളായി ഹമാസ് മാറിയെങ്കിലും, ഇസ്രായേലിന്റെയും അമേരിക്കയുടെയും അറബ് രാജ്യങ്ങളുടെയും ശക്തമായ എതിര്പ്പുകള് നിലനില്ക്കുന്നതിനാല് ഗാസയുടെ ഭരണം വീണ്ടും പിടിച്ചെടുക്കാന് ഹമാസിന് കഴിയില്ലെന്ന് പ്രമുഖ നയതന്ത്ര വിദഗ്ധര് ചൂണ്ടിക്കാണിക്കുന്നു.